1Ti 3 | ASO | STEP | Ve ma aza gizebo ve lolo' olosa ive nene mo gono gihile lamine' malo' nene lulo nomolave li evenelite laa' nani' nene mo lamine' laa' nave.

1 Timothy 3

Mono' Gizebo Ve Lili' Ilizado' Lisihe' I Minilizaveti Monovomu' Timoteo'ni Lo-dine' Gamazi

1 Ve ma aza gizebo ve lolo' olosa ive nene mo gono gihile lamine' malo' nene lulo nomolave li evenelite laa' nani' nene mo lamine' laa' nave. 2 A'mine gono nene gono lamine' nenako a'mine gizebo ve lolo' ilive nene eveneliti ve'nido' nene monovo goloso'vesi minamaa' ilive minoo vene' hamo' do minive mino getipe ve minamo monovo goloso ogalove lo monovo'velo' gizebo ogo inite' ogo molo iline' nene mo lisihekovo' ilive mino venenga ve ngele'mize lamine' oga' ive mino evene' gamazi apize ngemaa' ilido' o minelive mineleseive. 3 Noso geli geli ogo naa' ive minamilive. Ido' evenekumu' izebolo' mala' mala' oga' ive minamo asi hongu lo-ngemo lamine' minaa' ive lovo lolize amaa' ilive minelive. Ido' a'mine mono' muliselo' gizebo o-ngedaa' ilive nene monimu' lulo molaa' ilive minamilive. 4 A'mine ve nene ei' vene' izipahala zuholo' gizebo lamine' ogo ngele'mize akalo' oga' neivo a'mine izipahala ingine me'nibinemu' gilavo dizavosa peleseve' izami gamazi'velo' gili daa' ave minelive. 5 Ne'mine noluvoni' nene eze zuho gizebo ogo ngele'mize akalo' o-ngedaa' monovo gele vevesamiline' nene O'moso'mi muliselo' gizebo oga' gono dalido' nene ngelo lisihe' o minelihe. Mo keke' lisihe' o minamoloseinako nemu' nene noluve. 6 A'mine mono' muliselo' gizebo ve nene monoku' olihe lodive amive evene' gosoho' ne'mine ele'mizi milalizani' nene ne'mine i-nidikeve loo oko'no do dizavo O'moso'mo Satani lihime molo-do mulumo gono emelesa neine' ne'mine ogo lihime molo-do mulumo gono emaalinako olihe monoku' lodive amive evene' gosoho' nene mono' gizebo ve lili' i-damilizave. 7 Ido' Izesu' evenele minamave nete ezemu' gamangi mili-daa' avevo' nene mono' gizebo ve lili' i-dilizave. Mono' gizebo ve nene ne'mine ve minamiline' nene evene' malite monovo goloso ogave li elemikevo Satani'mo emengu' molo ivile' ogavo lihime daalive losa noluve.

Mono' Muliselo' Medeli Mini Ato Ato' Gonolo' Gizebo Ve Lili' Ilizado' I Minilizaveti Monovomu' Timoteo'ni Lo-dine' Gamazi

8 Ido' mono' muliselo' medeli mini ato ato' gono ado' goho' gahali' nasahili' i-ngidaa' gono nevo'mido' gizebo ve nete nene a'mine'mine igi mono' muliselo' gizebo ve ne'minisa mini evenelite gamangi mili-ngidilizado' i minave mini evene' go'ine izaa' ave minami noso geli geli igi naa' ave minami monovo goloso igi moni heneni vai' dalisa gilaa' ave minami 9 monoli'mi suno' gamazi O'moso'mo do soto' o-lede neine' nene di mini mono' gili nizado' nene ha e'metivo' minisa engi' lu'ningu' monovo goloso minivo ningisa'mave minilizave. 10 Ido' a'mine ato ato' gonolo' gizebo ve lili' i-ngidilizave nene gomu' engi' monovomu' ize' mili-ngidi ningavo engita a'mine e'metamilizave luvoni' initekuti' nene ma nomivo minilizanikovo' nene a'mine gonolo' dalizangumu' di oti-ngidilizave. 11 Ido' engikisi bizi minani' vene' neve nene evenelite gamangi mili-ngidilizado' lisihe' i minani' vene' minii divi ledivi' gamazi li-ngidisa'mani' vene' mini negi hizami monovo'nido' gizebo lamine' igi mini ne'mine mana'mine gono dalizani' nene monovo lisihetokovo' e'metisa di minilizani' vene' minilizave. 12 Ido' a'mine ato ato' gonolo' gizebo ve lili' i-ngidilizave nene vene' hamo' di minisa engi' izipaha'nidokisi engi' numu'ningu' ingaa' avelokisi nene gizebo lamine' i-ngidi ngele'mize akalo' iga' ave minilizave. 13 Ne'mine noluvoni' nene nanitekumu' ve. A'mine gono'ine nene laminisa ma di minilizani' nene evene' gilavo dizi minisa Izesu' Kilisitodo' gi'mizo mino gelaa' noune' monokumu' nene ngehelele izamivo livi kiselivi' ilisanako nemu' nene noluve.

Gamazi Mene Gizuvoni' Nene Naza Geto Ma Naamolongumu' O'moso'mi Evenele Zuho Igi Mili Ilizani' Monovomu' Gele Mineline Losa Gamazi Mene Nogizuve Lo Lo-imine' Gamazi

14 Naza gei' nanida nene lite' lo alohe lo gele nouha lite' lo amuvo ma nene gaza ladani amo O'moso'mi evenele zuhouti' alevelite igi mili ilizani' monovomu' nene gaza gele mineline losa gamazi mene nogize-giduve. A'mine O'moso'mi evenele zuhomu' luvoni' nene minevo' minevo' oga' neine' O'mosola gi'mizunive leli' mulisemu' nene luve. Langise ne'mo numuno hize ele' ogo do minaa' neine' ne'mino gamazi gihile hize ele' ogo do minaa' neine' nene leli' O'moso'mi evenele mulise neve nene none. 16 Ido' suno' gamazi leli' monoteu' soto' ogo minine' nene gamazi naba neive lo lo soto' oga' noune' nene ado'

Kilisito' ei' nene leli' okode ne'mine do otuho soto' ogo minavoo
ei' monovo've nene mo lisihe' o neive lo
Sikalahuli'mo do soto' ogo lelebizavosa
angelo' ma netesi nene ningikevo
evene' zuho ato atotidasi gamazi've nene li soto' igi li-ngimikevo
me misubouko aleve linge netesi nene ezemu' gili ele'vole' ani' ve.
Ido' eze nene O'moso'mo Okulumo' ebe' laminekuko ele'mizo dizine' ve.